آئی ایس آئی ایس نے خلافت کے اعلان کے ساتھ ہی نیا نقشہ جاری کردیا

30 جون 2014 (21:42)

بغداد(نیوز ڈیسک) گزشتہ روز مشرق وسطیٰ میں تہلکہ مچانے والی شدت پسند تنظیم داعش(ISIS) نے خلافت کے قیام کا اعلان کرتے ہوئے تمام دنیا کے مسلمانوں کو پیغام دیا ہے کہ تنظیم کے سر براہ ابوبکر بغدادی کو خلیفہ تسلیم کر لیں۔ دلچسپ بات یہ ہے کہ اس اعلان کے ساتھ ہی تنظیم کا پانچ سالہ ایجنڈا ایک نقشے کی صورت میں جاری کیا گیا ہے ۔اس مجوزہ نقشے میں مشرق وسطیٰ ، شمالی افریقہ، یورپ اور ایشیاءکے کئی ممالک شامل ہیں۔ یورپ میں سپین اس ’خیالی سلطنت‘ کا حصہ دکھایا گیا ہے اور ایشیاءمیں پاکستان اور افغانستان بھی اس میں شامل ہیں ۔ISISکے ترجمان ’ابو محمدالعدنانی ‘ کا کہنا ہے کہ خلافت کے قیام کے ساتھ ہی تمام ممالک کی اتھارٹی غیر قانونی ہو چکی ہے اور تمام مسلمانوں کو چاہیے کہ وہ اپنے خلیفہ کی آواز سنیں اور اس کی اطاعت کریں ۔جاری کئے جانے والے نقشے کے ساتھ ہی پانچ سال کے اندر اندر ان علاقوں میں اپنی حکومت کے قیام کا اعلان کیا گیا ہے۔ ساتھ ہی ISISکا استفسار ہے کہ اسے ISISکے بجائے ’اسلامی ریاست‘ کہ کر مخاطب کیا جائے ۔اب اس تنظیم کے یہ خواب کس حد تک پورے ہوتے ہیں یہ تو وقت ہی بتائے گا۔