آئی ایس آئی ایس نے ممکنہ اسلامی ریاست کا نقشہ جاری کردیا

بغداد(مانیٹرنگ ڈیسک)شام اور عراق میں سرگرم عسکریت پسند گروپ ’ آئی ایس آئی ایس ‘ نے ممکنہ طورپر بغداد پر قبضے کے بعد اپنی خیالی اسلامی ریاست کا نقشہ جاری کیا ہے جس میں خلیجی ریاست کویت کو بھی اس کا حصہ دکھایا گیا ۔ خیال رہے کہ داعش نے اپنی مجوزہ اسلامی ریاست کا نقشہ ایک ایسے وقت میں جاری کیا ہے جب تنظیم نے عراق کے متعدد شہروں پر کنٹرول حاصل کر چکی ہے اور بغداد کی طرف پیش قدمی جاری ہے۔

دوسری طرف کویتی وزیر اعظم نے اپنے عراقی ہم منصب نوری المالکی سے ٹیلیفون پر بات چیت کرتے ہوئے امن وامان کی موجودہ صورت حال بالخصوص داعش کی تیزی سے پھیلتی عسکری سرگرمیوں پر تبادلہ خیال کیا۔کویتی سیکرٹری خارجہ خالد الجار اللہ نے داعش کی سرگرمیوں پر گہری تشویش کا اظہار کرتے ہوئے تسلیم کیاکہ داعش جیسے گروپ نہ صرف کویت کے لیے خطرہ ہیں بلکہ یہ تمام عرب ممالک کی سلامتی کے لیے تباہ کن ثابت ہو سکتے ہیں۔

اس سے قبل عراق کے شمالی علاقوں میں گذشتہ چار کے دوران سرکاری فوج کے مقابلے میں میدان جنگ میں نمایاں کامیابیوں کے بعد داعش کے ترجمان ابو محمد العدنانی نے ایک آڈیو پیغام میں جنگجوﺅں سے کہا ہے کہ وہ بغداد کی جانب چڑھائی کی تیاری کریں،سیاہ لباس میں ملبوس داعش کے جنگجوو¿ں نے مقامی مسلح مزاحمت کاروں کی مدد سے گذشتہ چار روز کے دوران عراق کے دوسرے بڑے شہر موصل ،سابق صدر صدام حسین کے آبائی شہر تکریت اور شمال میں واقع دوسرے چھوٹے، بڑے شہروں اور قصبوں پر قبضہ کر لیا ہے اور وہاں سے عراقی فوج کو ماربھگایا ہے یا عراقی فوج خود ہی اپنی چوکیاں اور یونٹ چھوڑ کر بھاگ گئے ہیں۔تکریت میں جہادیوں نے شہر کا نظم ونسق چلانے کے عارضی تعیناتیاں بھی کردی ہیں ۔ یہ تنظیم پچھلے تین سال سے شام میں صدر بشار الاسد اور باغی فوج جیش الحر کے خلاف بھی سرگرم ہے۔